Við erum öll einstök, höfum ólík markmið, mismunandi hreyfigetu, styrkleika og takmarkanir svo eitthvað sé nefnt. Í mínum huga er því ekki til neitt sem heitir “rétt golfsveifla”. Ef þú vilt byrja í golfi eða ert kylfingur sem vilt bæta leikinn, þá finnum við leið sem hentar þér.

Þegar ég kenni byrja ég á að skoða hvað líkaminn þinn leyfir þér að gera á náttúrulegan hátt. Ég vinn með styrkleikana þína, bæti veikleikana og finn lausnir sem henta þér og þinni hreyfingu.

Ég legg mikla áherslu á að hjálpa þér að skilja boltaflugið og hvað hefur raunverulega áhrif á gæði höggsins. Þegar þú skilur hvernig kylfan hreyfist í gegnum höggsvæðið og af hverju boltinn gerir það sem hann gerir, verður auðveldara að byggja upp sveiflu sem þú getur treyst og endurtekið sem oftast.

Markmiðið er ekki að búa til fullkomna sveiflu, heldur að hjálpa þér að þróa golfsveiflu sem virkar fyrir þig. Sveiflu sem hentar þínum líkama, þínum leik og gerir þér kleift að spila golf með meira sjálfstrausti, meiri stöðugleika og meiri ánægju.

Ef þú ert með fyrirfram ákveðna hugmynd um hvernig golfsveifla „á“ að líta út, þá hvet ég þig til að skoða myndina hér að neðan vel. Þar má sjá tólf núverandi og fyrrverandi atvinnukylfinga í efstu stöðu afturveiflunnar – tólf ólíkar stöður, tólf mismunandi hreyfingar og tólf einstakar sveiflur. Allar eiga þær þó sameiginlegt að hafa komið kylfingunum í hóp bestu golfara í heimi.